شۈ زىتۇڭ

　قەلبىمنىڭ چوڭقۇر قاتلىمىغا بىر مۇلايىم بۇلۇڭ يوشۇرۇنغان، ئۇ يەردە بىر دانە سېرىق رەڭلىك كۈنلۈك بار.

　بىر كۈنى چۈشتىن كېيىن، مەن نۆۋەتچى بولۇش سۈپىتىم بىلەن نۆۋەتچىلىك قىلىشقا قېپقالدىم، قاراڭغۇ چۈشۈشكە باشلىدى، مەكتەپتىن قويۇپ بېرىش قوڭغۇرىقى ئىككىنچى قېتىم چېلىندى، مەن سۈپۈرگىنى يىغىشتۇرۇپ ئۆيگە قايتىشقا تەييارلىق قىلدىم.

　ئويلىمىغان يەردىن ئاسماندىن گۈلدۈرلىگەن ئاۋاز ئاڭلىنىپ، ئۇزۇن ھەم يورۇق چاقماق كۈلرەڭ ئاسماننى يېرىپ ئۆتتى، يامغۇر تامچىسى خۇددى يىپى ئۈزۈلگەن مارجاندەك شارىلداپ چۈشۈپ، سىنىپنىڭ دېرىزىسىگە ئۇرۇلدى. ئىشنىڭ چاتاقلىقىنى كۆرۈپ، مەن دەرھال بوغچامنى ئېلىپ سىنىپتىن ئېتىلىپ چىقىپ، ئىككى، ئۈچ قەدەمنى بىر ئېلىپ مېڭىپ دېگەندەك بىنادىن چۈشۈپ، مەكتەپنىڭ زالىغا كەلدىم. 

　مەكتەپنىڭ دەرۋازىسى ئالدىغا سۇ يىغىلىپ كۆللىنىپ قالغانىدى، مۇزدەك سۇ تامچىلىرى ئىشىك لەمپىسىدىن توختىماي چۈشۈۋاتقان بولۇپ، خۇددى «سۇ پەردىسى غارى»غا ئوخشاپ قالغانىدى. چۈشۈۋاتقان سۇ تامچىلىرىنىڭ خۇددى ئۇششاق شېغىللاردەك يەردىكى كۆللىنىپ قالغان سۇغا قاتتىق ئۇرۇلۇپ، غايەت زور سۇ بۇژغۇنلىرىنى ھاسىل قىلغانلىقىنى كۆرۈپ ئىختىيارسىز تىترىدىم. تاش مايمۇن سەكرەپ ئۆتۈپ مايمۇن شاھقا ئايلانغان بىلەن، مەن سەكرەپ چىقسام، سۇغا چۈشكەن مۈشۈكتەك بولۇپ قالارمەن.

　يازدىكى قارا يامغۇر ھەقىقەتەن قورقۇنچلۇق ئىدى، ئالدىنقى بىر سېكۇنتتىلا كۈچلۈك ئاپتاپ ئادەمنى ئېرىتىۋەتكىلى تاس قالغانىدى، كېيىنكى بىر سېكۇنتتا چېلەكلەپ قۇيغاندەك يامغۇر يېغىپ كەتتى. سۇ تامچىسىنىڭ چۈشكەن ئاۋازى مېنى قەلبىمدە بىر سائەت تەۋرىنىۋاتقاندەك ھېسقا كەلتۈردى، ھەربىر تامچە چۈشسە، بىر سېكۇنت ئۆتۈپ كېتەتتى. مۇزدەك سۇ ئاۋازى قەلبىمنى پاراكەندە قىلىۋەتتى: ۋاقىت شۇنچە تېز ئۆتۈۋاتىدۇ، لېكىن يامغۇرنىڭ توختايدىغان تەرى يوق. مەن ئامالسىز ئۇلۇغ- كىچىك تىنىپ قويدۇم، ئەجەبا يامغۇرنىڭ توختىشىنى ساقلاشتىن باشقا ئامال يوقمۇ؟ پەقەت ئانامنى يەنە ئەنسىرەپ قالمىسىكەن دەيتتىم. ئانامنىڭ ئۆيدە تىتىلداپ كېتىۋاتقان كۆرۈنۈشىنى ئويلاپ، مەنمۇ تىتىلداپ، زالدا ئايلىنىشقا باشلىدىم.

  تۇيۇقسىز، كۆزۈمگە بۇلۇڭدىكى بىر سېرىق رەڭ چېلىقتى، سىنچىلاپ قارىسام كۈنلۈك ئىكەن. مەن ئەتراپقا نەزەر سالدىم، مەكتەپتىكىلەرنىڭ ھەممىسى كېتىپ بوپتۇ، بۇ كۈنلۈكنىڭ ئىگىسى ۋاقتىنچە ئۇنىڭغا ئېھتىياجلىق ئەمەستەك قىلاتتى. «كەچۈرۈڭ، بۈگۈن ئارىيەت بېرىپ تۇرۇڭ، مەن ئەتە چوقۇم جايىغا قويۇپ قويىمەن»، مەن ئىچىمدە شۇنداق دېدىم ھەمدە كۈنلۈكنى قولۇمغا ئالدىم.

　كۈنلۈكنى ئاچتىم، بىر قەغەز پارچىسى يەرگە چۈشتى، ئۇنىڭغا خەت يېزىلغانلىقىنى كۆرۈپ، كۆزۈمنى يوغان ئاچتىم. «لازىم بولسا بۇ كۈنلۈكنى ئىشلىتىڭ!»

　قەلبىمدىن بىر خىل ئىللىق ئېقىم ئۇرغۇدى، ناتونۇش كىشىنىڭ بۇ خەتلىرى قىڭغىر- قىيسىق يېزىلغان بولۇپ، تۆۋەن يىللىقتىكى بىر كىچىك دوستنىڭ قولىدىن چىققاندەك قىلاتتى، لېكىن سەبىي پوچېركىسىدىن سەمىمىيلىك ۋە ئاق كۆڭۈللۈك چىقىپ تۇراتتى. مەن قەغەزنى ئاستا قاتلاپ، ئالىقىنىمدا سىقىمداپ، قەلبىمنىڭ چوڭقۇر قاتلىمىدا ساقلىدىم: «رەھمەت سىزگە، ناتونۇش دوست».

　بۇ سېرىق رەڭلىك كۈنلۈكنى تۇتۇپ، مەن مەكتەپ دەرۋازىسىدىن چىقتىم. ئاسماندىن چۈشۈۋاتقان يامغۇر كۈنلۈكتىن قاڭقىپ چىقىپ، دانە- دانە سەكرىمە نوتىلارنى ھاسىل قىلىپ، شادىيانە كۈيلەرنى ھاسىل قىلدى. سېرىق رەڭلىك كۈنلۈك خۇددى بۇ كۈلرەڭ دۇنيادىكى قۇياش نۇرىغا ئوخشاش، پارلاق، ساپ، كۆزنى قاماشتۇرىدىغان، جەلپكار بولۇپ، ئۇ ئەتراپىمدىكى ئىس- تۈتەكنى تارقىتىۋېتىپ، نەم، سوغۇق ھاۋانى ئىللىتتى، مېنىڭ بەدىنىممۇ خۇددى بۇلۇتلار ئارىسىدا كېتىۋاتقاندەك، بارغانسېرى يەڭگىللەپ قالدى.

　بىر يامغۇرلۇق كۈن، بىر كۈنلۈك، بىر پارچە خەت قەلبىمدىكى ئەڭ ئىللىق بىر بۇلۇڭغا ئايلاندى.

　ئىككىنچى كۈنى ئەتىگەندە، مەنمۇ ئۆيدىن بىر كۈنلۈك ئېلىپ مەكتەپكە بېرىپ، ئۇنى سېرىق رەڭلىك كۈنلۈك بىلەن بىللە زالنىڭ بۇلۇڭىغا قويۇپ قويدۇم ھەمدە يېنىغا قەغەز پارچىسىنىڭ مەزمۇنىغا ئوخشاش مەزمۇندىكى بىر قەغەز كارتا قويۇپ قويدۇم. كۈنلۈكنى تېخىمۇ كۆزگە چېلىقىدىغان قىلىش ئۈچۈن، مەن ئالايىتەن ئوچۇق قىزىل رەڭلىكنى تاللىدىم. بىرى قىزىل، بىرى سېرىق، يامغۇرلۇق كۈنلەردە ساۋاقداشلارغا يورۇق تۈس قوشۇشنى ئۈمىد قىلدىم. 

　قاچاندىن باشلاپكىن، ھەر قېتىم مەكتەپنىڭ زالىدىن ئۆتكىنىمدە، بۇلۇڭدا يەنە بىرنەچچە كۈنلۈك كۆپىيىپ قالىدىغان بولۇپ قالدى، ئەڭ دەسلەپتە ھاۋا رەڭ، ئارقىدىنلا ياپيېشىل، بارا- بارا بۇلۇڭغا رەڭگارەڭ كۈنلۈكلەر توشۇپ كەتتى، قاتتىق ھەم سوغۇق تاش تاختايدا رەڭگارەڭ گۈللەر ئېچىلدى.

　قىزىل، قىزغۇچ، سېرىق، يېشىل، كۆك، سۆسۈن، ھەربىر كۈنلۈككە ساۋاقداشلارنىڭ ياخشى كۆڭلى مۇجەسسەملەنگەن، ھەربىر كۈنلۈك چەكسىز ئىللىقلىق ئېلىپ كەلگەن بولۇپ، ئۇلار بىرلىشىپ يامغۇردىن كېيىنكى ئەڭ گۈزەل ھەسەن- ھۈسەننى ھاسىل قىلغانىدى.

　(ئاپتورنىڭ ئادرېسى: سۇجوۋ پەن- تېخنىكا شەھەرچىسى چەت ئەل تىلى مەكتىپى)

　(پايدىلانغان مەنبە: «ئۆگىنىش كۈچلۈك دۆلىتى» ئۆگىنىش سۇپىسى)

　تەرجىمان: مۇبارەك ئىسمائىل

مەسئۇل مۇھەررىر：穆巴拉克·司马义

نەشر ھوقۇقىغا ئىگە ئەسەر، ھوقۇق بېرىلمىگەن ئەھۋالدا باشقا سۇپىلارغا كۆچۈرۈپ ئىشلىتىش قاتتىق مەنئى قىلىنىدۇ. باشقا سۇپىلارغا كۆچۈرۈپ ئىشلەتكەندە مەنبەسى، ئەسلىي ماۋزۇسى، ئاپتورنىڭ ئىسمى ئەسكەرتىلىشى كېرەك، يادرولۇق مەزمۇنىنى ئۆزگەرتىشكە بولمايدۇ. ۋېيشىن دوستلار چەمبىرىكىگە، دوستلارغا ھەمبەھرىلەپ قويۇشىڭىزنى قارشى ئالىمىز.